poetry

Bonsai
ni Romulo P. Baquiran

Naniniwala ako nang lubusan:
wagas na pag-ibig ang nagtutulak
sa iyo upang hubugin ako sa kaliitan.
Mapagpala ang bihasa mong pagpilipit
sa sanga kong nagpipiglas sanang tumayog
upang higit na matikman ang bukanliwayway;
mapagkandili ang tiyak mong paglagas
sa mga dahon kong nagsisikap dumami
sa pag-asang masinghot ang samyo ng amihan;
mapagmahal ang gawisik mong pagdilig
sa pagkapuno kong naghahangad yumabong
sa pinakamahusay na alay mong daigdig.
Sang-ayon akong lahat sa iyong niloloob
pagkat batid kong ang lahat ng maselang sining
ay para sa aking ikabubuti at ikariringal.
Walang pasubaling tinatanggap ko,
nang walang alinlangan, ang iyong pag-ibig.

27 Disyembre 2002

back to poetry | home