poetry

Komperensiya sa Makiling
ni Ronald Atilano

Dinatnan natin ang bakanteng kubo sa dalisdis
ng bundok, tayong inabot ng dilim sa gubat.

Pinagpag natin ang alikabok ng kapatagan
At nangahas tayong mabuwal sa kawayang sahig,

Tumitig sa nakasuksok na itak sa sawali
At kaputol na paa ng musang. Paglalim ng gabi’y

Nagpalitan tayo ng mga retaso ng orasyon,
Sinuri sa tela ang pitumpu’t pitong kombinasyon

Ng sagradong palabra: bertud laban sa lamang-lupa
At baluti sa bala. At habang nagpipingkian

Ang matatalim nating mga Latin sa hatinggabi,
Nilingon natin ang langitngit sa ating likuran –

Nakamasid sa atin ang Mutya ng kabundukan
Habang sa labas, umaawit nang buong hiwaga ang gubat.

Oktubre 5, 2005

back to poetry | home