poetry

Paggikan sa Sumilon
ni Jeneen R. Garcia

Gusto unta ko mosuwat og balak
bahin sa dagat, para nimo,
bahin sa tanan nakong nakat-onan
sa pagsawom niining kaladmon:
ang paglutaw dinhi sa bug-at nga tubig
nga nagsangga ning maong isla,
ang pagsagol sa parat ug tam-is
sa tumoy sa akong dila,
ang pagsagubang sa init sa akong panit
samtang ang kabugnaw nibukot
sa akong kaunuran.

Pero ang dagat linaw man karon,
nisanap sa kawanangan,
tin-aw ang kinailadman, sama sa papel
nga nahanawan og mga pulong.
Ug ang tubig nga nagdagayday
sa akong ngabil, wala na’y parat,
naughan sa hangin, nahilom.

back to writing from the regions | poetry | home