poetry

          Irong Latagaw
(kung nganong nangawala ang
mga adik sa Brgy. Agdao)
ni Errol A. Merquita

Wa ka kabalo
daghan gapaniid sa imo;

sa matag oras
nga musuroy ka-
          naay matang gabantay.
sa kada tao
nga imong gikaistorya-
          naay kamot nga galista.
sa mga dalang
imong giaagian-
          naay lit-ag nga gapaabot.

Ug parehas sa mga nangaging gabii,
naay gidakop ang mga gwardya
nga irong latagaw.
Gibukbok,

ang iyang ulo og kahoy
gisulod sa sako,
gikuyod ang lawas sa semento,
samtang mipatagaktak ang
basiyo sa kwarentay singko
hangtod nga ang iyahang tyabaw,
namahimong dugo nga
mibisbis sa yuta uban
sa pagkatag sa mga bakho.

Kinsa ang musunod?
Wala ka kabalo
nakalista na imong
pangalan isip usa ka

Irong latagaw!

back to writing from the regions | poetry | home