poetry

Payag
ni Errol A. Merquita

ginabuslotan sa ulan
ang atop nga
hinimo sa sulirap.

Hinay-hinay’ng

ginapahumok sa mga
kadlawon ug kagabhion
ang mga bungbong nga
nagkaanam na og kadugta
sa tumang katugnaw.

Ug samtang ginakitkit
sa mga anay ang
nahibiling bagakay
sa salog, hinay-hinay’ng
ginaputos sa mga lawa-lawa
ang mga siradong bintana.

Ang kaniadtong
lig-on ug masadya
nga payag hinay-hinay
nang nangagum-og ang
mga tukod niini.

Ing-ana kining akong dughan
sukad imo kong giluiban.

Ahh, patya na lang ko!

March 2002

back to writing from the regions | poetry | home