poetry

Maysaka a misterio, espiritu a nagparang
Manipud iti tapok ti tanem dagidi apongmi iti tumeng
Ti init, impaayannaka’t bileg, sinuknorna ‘ta bagim
Nagpayakpakka, immaynakam inampayagan
Inkuyogmo dagiti kimata a silawmo’t kasipngetan
Ken gurruod, kasla riniwriw a tambor
A kadakami nangriing
Dinuktalmo ti kabibiagmi, ti agdama a puli
Binangonmo ti rangtay a namagkamang agsupadi a panawen
Ket nagtupa ti inuugma ken baro a kannawidan
Baro ngem binulod, daan ngem kabukbukodan
Dakam’ nga an-annabo, sangsangkamaysa ngem nasinasinan

Ammomi, nasdaawka iti naimataugam
Addaanen iti baro a rupa, dagiti pagnaedan
Estilo Italiano, Arabo, ken Amerikano
Taeng dagiti appo a nagaliwaksay
Dagiti kinelleng a banas, bangkag, ken solar
Addaanen sabali a maris ken ladawan
Dagidi abut a naglutuanda iti dili, nagaburanen
Dagidi magey a taltalienda napuoranen
Ngem dakami a maikalima a kaputotan nagasat pay laeng
A pinanawanda a puli, adun ti nagbaliwan ti biagmi
Agpapan pay a linikudanmin dagiti talon, inanayen
Dagiti arado, pak-ol, tawidmi a pasagad
Nasidamin dagidi napigsa a nuang nga isangsangolmi
Killokillon dagiti gakatmi a raep, masadutkamin nga agani
‘Bag ketdi ta mayanusmit’ mangararawan
Kasla ngamin sala daytoy a kabaruan
Ti binulan a paw-it dagiti sagibomi iti layasan
Ti pangandingaymi iti biagmi nga agkakabagian

Gayam, Kali, iti panagsublim iti lugar a tinaudam
Sawem a duaduan ti ar-arkilaenmi a lugan
A pangitulod iti maudi a biahe dagiti ipatpateg iti biag
Idiay kano America, iti pumpon awanen ti mayat a magna
Saan nga uso ti musiko, mabutengda nga agrukrok iti baka!

back to writing from the regions | poetry | home