“Yosi Kadiri.” Isa ito sa mga ginawang kampanya ng pamahalaan laban sa paninigarilyo. Sang-ayon ako rito. Ang yosi o sigarilyo naman talaga ay nakakadiri.
Hindi dahil sa amoy nito o sa dating ng taong gumagamit, ngunit dahil sa nakababahalang epekto nito sa ating kalusugan — gumagamit ka man nito o hindi.
Napapanahon na ang nationwide smoking ban sapagkat lalong tumataas ang bilang ng mga Pilipinong nasasawi dahil sa mga sakit na may kinalaman sa baga, at ang isa sa mga sanhi nito ay ang sigarilyo.
Ayon sa Department of Health, isa pa rin ang lung diseases sa mga nangungunang rason kung bakit nasasawi ang maraming Pilipino. Ito ay sa kabila ng pagkakaroon ng lunas sa halos lahat ng sakit sa baga.
Ang itinuturong dahilan, ang paninigarilyo. Dahil hindi agad nakikita ang komplikasyon ng paninigarilyo tulad ng unti-unting pagkasira ng baga, ay hindi naaagapan ang gamutan sa mga tinatamaan ng komplikasyon.
Ang masaklap pa, ayon sa ilang pag-aaral, mas malaki ang pinasalang nakukuha ng second hand smoking o iyong mga nalalanghap lang ang usok mula sa sigarlyo ng iba.
Kaya naman kung nais nating mapababa ang problema sa mga sakit na may kinalaman sa baga, dapat nang ipatupad ang nationwide smoking ban bago mas maraming baga pa ang maupos na parang sigarilyo.
